قوستانايدا قازاقشا كۇرەستەن «ونەر بارىسى» اتتى وبلىستىق جارىس وتەدى. بۇل وبلىستاعى ونەر ماڭايىندا جۇرگەن جاستاردىڭ, انىعىن ايتساق, ءى.وماروۆ اتىنداعى قازاق دراما تەاترىنىڭ اكتەرى تولەندى القوجيننىڭ تىكەلەي باستاماسى.
جاس اكتەردىڭ باستاماسىنا وبلىستىق مادەنيەت باسقارماسى ىلە قولداۋ كورسەتىپ, ونىڭ ۇيىمداستىرۋىنا, قارجىلاي جاعىنان دا كومەك كورسەتىپ وتىر. «ونەر بارىسى» جارىسىنا, ارينە, كاسىبي سپورتشىلار ەمەس, اۋەسقويلار قاتىسادى. 3-4 مامىر كۇندەرى «قازاقستان بارىسى» رەسپۋبليكالىق ءتۋرنيرىنىڭ «قوستاناي قىرانى» دەپ اتالاتىن وبلىستىق ىرىكتەۋ ساتىسى وتەدى. «ونەر بارىسى» سول 4 مامىر كۇنى وسى جارىسقا جالعاساتىن بولادى.
«ونەر بارىسىنا» ءبىر سوزبەن ايتقاندا ءانشى, جىرشى, اقىن, اسابا, رەجيسسەر سەكىلدى ونەردىڭ اينالاسىندا جۇرگەن سەرى جىگىتتەر ءوز ەرىكتەرىمەن قاتىسادى. قازىردىڭ وزىندە 30 جىگىت جازىلىپ وتىر. مۇندا جۇلدە بولمايدى, ويتكەنى بۇل جارىس سپورتتى ناسيحاتتاۋمەن بىرگە, قايىرىمدىلىق پارىزىن اتقارادى, – دەدى وبلىستىق مادەنيەت باسقارماسىنىڭ باسشىسى ەرلان قالماق.
ەرلان بولات ۇلى باستاما كوتەرۋشىلەردى وبلىستىق «كوستانايسكيە نوۆوستي» گازەتى جانىنداعى «جيزن نا لادوني» قايىرىمدىلىق جوباسىنىڭ جەتەكشىسى ولگا ابالاكوۆامەن كەزدەستىرىپ, جاستاردىڭ باستاماسىنىڭ يگى ىسكە جالعاسۋىنا مۇرىندىق بولدى.
«باستامالارىڭىزعا راحمەت. ءبىزدىڭ جوبادا ءبىر جارىم جىل بويى كەزەكتە تۇراتىن بالالار بار. بارلىعىنا دا كومەك كەرەك. سىزدەردىڭ وتكىزەتىن قايىرىمدىلىق تۋرنيرىنەن تۇسەتىن قارجى تورعاي وڭىرىندەگى كوپ بالالى جەكسەنبايلار وتباسىنىڭ قۇلاعى ناشار ەستيتىن 8 جاستاعى اقەركە دەگەن قىزىنا ەستۋ اپپاراتىن ساتىپ الۋعا جۇمسالاتىن بولادى. ول رەسەيدە كەمىندە 500 مىڭ تەڭگە تۇرادى» دەدى ولگا افاناسەۆنا.
ءنازيرا جارىمبەت,
«ەگەمەن قازاقستان»
قوستاناي